Im Winter simmer immer is Hallebad
Mir sind in McDonalds gange
Go es Goggi trinke
Ich glaub es hät zwöi Franke koschtet
Mir sind mitem Bus
Mitem Velo nach Spreitebach gfahre
Vo Butisholz uf Nottwil gfahre
Is Paraplegikerzentrum
Und hät det Passföteli gmacht
Mir sind öppe ölfi gsi und
Seinzige wo eus interessiert hät isch
Mit de andere zschnorre
Nochär hämmer meischtens no chli chönne
Chrömle dusse am Kiosk
Irgendwo häts amigs denn au no
So en Grenzstei
Zwüsched em Kanton Aargau und
Em Kanton Züri gha
Später bini mol glaub zwöi Johr lang
Heimlich verliebt gsi id Tochter
Vo mim Mathilehrer
Ich bin mega verliebt gsi aber
Ich ha nöd recht gwüsst
Wie me das eigentlich aspricht
Und ähm,
Ich glaub ich has niemerem gseit
Immer vor dere Chorprob
Womer so mega blödi Lieder gsunge händ
So wie Highway vo Mäsh
Hämmer ufem chline Ghettoblaster
Im Chilegmeindhus zäme Musig glost
Vode PJ Harvey zum Bispil
Oder OK Computer
Und nochhär han ich ihre denn
Irgendeinisch es Email gschribe
Und denn hät sie gseit,
Dass sie i öpper andersch verliebt isch
Aber dass es ihri fründinne alli
Mega herzig gfunde händ
Und er hät sone erbchrankheit gha
Wo mis Mami gseit het
Dass mer das nöd überlebt,
Dass mer villicht höchschtens zwänzgi wird
Und ähm,
Mir händ denn zäme e band gründet und
I üsem Bandrum häts no anderi Nochbare gha
Das sind so füf Johr, sächs Johr älteri
Hip-Hopper gsi, die händ det eifach inegweedet
Und mir eigentlich au
Mir händ Bilder vom HR Giger ufgänkt
Und irgendwänn hät mer das ganze
Fabrikgelände abgrisse und dänn...
Sind det Wohnige anecho
Und nocheme Wiili hemmer so afo jamme
Und eigeti Idee irgendwie entwickle
Und irgendwie ischs denn eifach so klar gsi
Dass ich denn singe
Und ich weiss no am Obe noch de Schuel
De bini so zu mim Mami und ha gseit
Lueg ich ha en Song gschribe
Und ich han en ihre vorgspilt
Und woni fertig gsi bin hani gmerkt dass sie brüelet
Bini chli verwirrt gsi
Und mir hend aber wie nid drüber gret
Sind au mal zäme anes Konzert gange
Im Hallestadion
Hämmer au so en Moment gha zäme irgendwie
Händ überleit öb das okay isch oder nöd
Wemmer sich sLäbe nimmt
Und denn hämmer eigentlich abgmacht
Dass mer eus zäme sLäbe nemed
Wänns zu blöd wird
Und denn simmer det so
Am Hauptbahnhof am Bode gläge
Bis d'Security cho isch und eus weggschickt hät