A lu Guarracino che jeva pe' mare
Le venne voglia de se 'nzorare,
Se facette 'nu bello vestito
De spine e de scarde pulito pulito
Cu 'na perucca tutta 'ngrifata
De ziarelle 'mbrasciolata,
Co lo sciabò scolla e puzine
De ponte angrese fine fine.
Doje belle cateniglie,
De premmone de conchiglie,
'Nu cappiello aggallonato
De codarino d'aluzzo salato
Tutto posema e steratiello,
Jeva facenno lo sbafantiello,
E girava de ccà e de llà:
La 'nnammorata pe' se truva'.
La Sardella a lu balcone
Jeva sonanno l calascione;
E a suono de trommetta
Jeva cantanno 'st'arietta:
"E llarè lo mare e lena
E la figlia d"a siè Lena,
Ha lasciato lo 'nnammorato
Pecché niente l'ha rialato".
Lo Guarracino che la guardaje
De la sardella s' annammoraje;
Se ne jette da 'na Vavosa
La cchiù vecchia e maleziosa;
L'ebbe bona rialata
Pe' mannarle la 'mmasciata;
La Vavosa pisse pisse
Chiatto e tunno 'nce lo disse.
Ma la sardella ch"a sentette
Rossa rossa se facette,
Pe' lo scuorno che se pigliaje
Sotto a 'no scuoglio se 'mpezzaie;
Ma la vecchia de vava Alosa
Subete disse - Ah schefenzosa!
De 'sta manera non truove partito
'Ncanna te resta lu marito.
Si aje voglia de t'alloca'
Tante smorfie non aje da fa',
Fora le zeze e fora lo scuorno
Anema e core e faccia de cuorno.
Ciò sentenno la zì Sardella
S'affacciaje a la fenestrella,
Facette 'n'uocchio a zennariello
A lo speruto 'nnammoratiello.
Ma la Patella che steva de posta
La chiammaje faccia tosta,
Tradetora, sbrevognata,
Senza parola, male nata,
Ch'avea 'nchiantato l'Allitterato
Primmo e antico 'nnammorato:
De carrera da chisto jette
E ogni cosa 'lle dicette.
Quanno lo 'ntise lo poveriello
Se lo pigliaje Farfariello,
Jette a casa s'armaje e rasulo
Se carrecaje comm'a 'no mulo,
De scoppette e de spingarde,
Povere, palle stoppa e scarde;
Quatto pistole tre bajonette
Dint'a la sacca se mettette.
'Ncopp"e spalle sittanta pistune
Ottanta bombe e ciento cannune;
E comm'a guappo Pallarino
Jeva cercanno lo Guarracino:
La disgrazia a chisto portaje
Che mmiezo a la chiazza te lo 'ncontraje
Se l'afferra p"o cruvattino
E po' lle dice: - Ah malandrino!
Tu me lieve la 'nnammorata
E pigliatella chesta mazziata.
Tuppete e tappete a meliune
Le deva paccare e secuzzune,
Schiaffe, ponie e perepesse
Scoppolune, fecozze e cunnesse,
Sceverechiune, sicutennosse
E ll'ammaccaie osse e pilosse.
Venimmoncenne ch'a lo rummore
Pariente e amice ascettere fore,
Chi co mazze, cortielle e cortelle,
Chi co spate, spatune e spatelle,
Chiste cu barre e chille cu spite,
Chi co ammennole e chi cu antrite,
Chi cu tenaglie e chi cu martielle,
Chi cu turrone e susamielle.
Patre, figlie marite e mugliere
S'azzuffajeno comm'a fere.
A meliune currevano a strisce,
De 'stu partito e de chillo li pisce,
Che bediste de sarde e d'alose,
De palaje e raje petrose,
Sareche, dientece ed achiate,
Scurme, tunne e alletterate!
Treglie, tremmole, trotte e tunne,
Fiche, cepolle, launne e retunne;
Purpe, secce e calamare,
Pisce spate e stelle de mare,
Pisce palumme e piscatrice
Voccadoro e cecenielle,
Capochiuove e guarracine,
Cannolicchie, òstreche e ancine.
Vongole, cocciole e patelle,
Pisce cane e grancetielle.
Spinole, spuonole, sierpe e sarpe,
Scauze, 'nzuoccole e colle scarpe,
Sconciglie, àmmere e ragoste,
Vennero 'nfino colle poste...
Muorze e pizzeche a beliune!
A delluvio li secozzune!
Non ve dico che bivo fuoco
Se faceva per ogne luoco!
Ttè, ttè, ttè, ccà pistulate!
Ttà, ttà, ttà, llà scuppettate!
Ttù, ttù, ttù, ccà li pistune!
Bù, bù, bù, llà li cannune!
Pistulate, scuppettate,
Li pistune, li cannune... Ah...
Ma de canta' so' già stracquato,
E me manca mò lo sciato;
Sicché, dateme licenza,
Graziosa e bella audienza,
'Nfì che sorchio 'na meza de seje,
Co' salute de luje e de leje,
Ca me se secca lo cannarone
Sbacantannose lo premmone.