هنا ضحكتلك الأحلام
بتفتحلك عينيها بيوت وتدخل قلبك المكبوت
وترسملك طريق الحلم روح مطليّه بالأزهار
هنا بنت وقلم ونهار
محبَّه بتدي للأعمار كمان أعمار
يميل جواك شراع الحلم، تقوم وتوزن الدفّه
في لحظة الناس بتتخفّى، لكن ربك هيبقالك
هناك مركب هتِرسالك،
فعيش فيها وعيش جواك
ولما الموج هيعلى عليك ماتتخفّاش
مفيش غيرك هيبقى معاك
فصون حلمك متكسرهوش
ووقت أما الجميع يخلى ما تتخلاش.
حاجات بتعيش في جفن العين،
تبان وقت أما كله يبوش
تصلب روحك الأحلام،
وقت الناس ما يبقوا فشوش
حاجات بتعيش في روحك عُمر،
هنا مثلاً دُعا أمك وقت الطيش
،وقت أما الجميع يِخلوا، بتدعيلك بطيب العيش.
هنا ضحكة أبوك صافيه بتندهلك،
أنا في ضَهرك إذا كل البشر ضَلّْك، أنا ضِلَّك.
إذا كل البشر خانك، أنا خِلَّك،
فمتخِّلش ولا تِنساش.
ولما الناس هتتخفّى، أكيد ربك هيبقالك
هناك مركب هتِرسالك،
فعيش فيها وعيش جواك
ولما الموج هيعلى عليك، ماتتخفّاش
مفيش غيرك هيبقى معاك
فصون حلمك متكسرهوش،
وقت أما الجميع يخلى ما تتخلّاش.