O, Magali, ma tant amado,
Mete la tèsto au fenestroun!
Escouto un pau aquesto aubado
De tambourin e de vióuloun.
Es plen d'estello aperamount! L'auro es toumbado;
Mai lis estello paliran,
Quand te veiran!
Pas mai que dóu murmur di broundo
De toun aubado iéu fai cas!
Mai ièu m'envau dins la mar bloundo
Me faire anguielo de roucas.
O, Magali! se tu te fas
Lou pèis de l'oundo,
Ièu lou pescaire me farai,
Te pescarai!
Vai, calignaire, courre, courre!
Jamai, jamai m'agantaras.
Iéu de la rusco d'un grand roure
Me vestirai dins lou boucas.
O, Magali! se tu te fas
L'aubre di mourre,
Ièu, lou clot d'èurre me farai,
T'embrassarai!
Se me vos prene à la brasseto,
Rèn qu'un vièi chaine arraparas ...
Iéu me farai blanco moungeto
Dòu mounastié dóu grand Sant Blas!
O, Magali! se tu te fas
Mounjo blanqueto,
Ièu, capelan, counfessarai,
E t'ausirai!
Aro coumence enfin de creire
Que noun me parles en risènt.
Vaqui moun aneloun de vèire
Per souvenènço, o bèu jouvènt!
O, Magali! me fas de bèn!...
Mai, tre te vèire,
Ve lis estello, Magali,
Coume an pali!
Coume an pali!
Coume an pali!
O Magali!