Di nòste bande i m'à insegnàt
Che prima a l'vé l'amùr per ol laorà:
Zamò de s-cècc quàt m'à tribölàt
Per imaparà ü bù mestér.
Mai e pò mai avrèss söspetàt
De pèrd ol pòst
Adèss che gh'ó esperiensa:
I à cancelàt la mé dignità,
ün òm s'pöl mia bötàl vià.
Làsses mia 'ndà,
Pènsa a chèi chi te öl bé,
Làsses mia 'ndà,
Te sé in gamba e te l'sé,
Làsses mia 'ndà,
A l'turnerà amò 'l seré...
In Bergamasca l'esèmpe m'ghe l'à:
A m'sìa magücc, pastùr, contadì,
Ma co l'inzègn, la buna olontà
Se ést i indüstrie a fiurì.
Ma gh'è tempesta, gh'è nìgher sö in val
Per ol tsunami globalisassiù:
In Cina, a l'Est i fà ingrassà ol capitàl
E i ditte ché i và a cagnù...
Làsses mia 'ndà,
Per tiràss amò in pé
(Làsses mia 'ndà),
Te bisògnet pò a' té;
Làsses mia 'ndà,
Te sé mia deperté.
Certo ol cör a l' fà mal
Ma l'è bröta per töcc,
Sóta i pucc, zó in de àl
Ol Sère e 'l Brèmp i è mai stöf;
Quace sècoi la mé zét
L'à ardàt l'aqua büligà
E l'à troàt amò la fórsa
Per tègn dür e per restà... Và mia vià!
A t'é guidàt töta la nòcc
Per strade fò de mà coi tò emossiù,
La Presolana al ciàr de lüna
La t'è facc vègn ol magù.
A te ölet mia lassà i tò contrade:
I stele alpine i crèss dóma in montagna;
Sènsa laorà i mör i valade
I t'à firmàt la condana.
Làsses mia 'ndà,
Quando s'gh'à ün ideàl
(Làsses mia 'ndà),
Ol destì s'pöl cambiàl,
Làsses mia 'ndà,
I è ché al vólt i tò amìs, ol tò mond, i raìs:
I tò raìs.