Allumadas de fogu
Chimbe carenas fritas:
Tintu a ruju an su logu
In oras malaitas.
Ballas graes at rutu
In sas frunzas d'armidda.
Chie bos faghet lutu
Mortos de Osposidda?
A sa tzega sas armas
Fiores an brujadu:
Sun negadas sas parmas
A su malefadadu.
S'istudat in su putu
Un'urtima ischintidda:
Chie bos fachet lutu
Mortos de Osposidda?
Sonende bos passizan
Finas in s'istradone:
Omines assimizan
A peddes de sirbone.
Sa pietade at sutu
Ranchida sa mamidda:
Chie bos fachet lutu
Mortos de Osposidda?
Ti essit dae su coro
Su sambene caente:
Mancu medaglia 'e oro
Tana dadu, Pitzente.
Pianghene a sucutu
Pitzinnos e pobidda:
Chie bos faghet lutu
Mortos de Osposidda?
Cantu tempus ancora
P'at a cherrer, o frade,
Pro chi nd'essamus fora
De sa barbaridade
E no canten su mutu
Sas feminas de idda?
Chie bos fachet lutu
Mortos de Osposidda?