U nostru amore
Allora, hè cusì ch'ellu finisce u nostru amore?
Senza un stridu è senza mancu un rimore
Ma incù issa ferita eterna in lu mio core
Hè natu in un surrisu è in un'ochjata d'armunia
In una stonda chjara è colma d'allegria
Ch'ella accadessi un ghjornu à mè ùn la cridia
Ripigliu
Tù eri u mio sole a mio più bella sinfunia
A mio sperenza è la mio più grande pazzia
Quella ch'inventa un universu incù una cria
Eo aghju cercatu un altra chì ti assumiglii
Ùn aghju più trovu isse stonde di magia
Ne mancu un sguardu di spartera è puesia
Oghje s'eo ti scrivu di issa terra di favore
Per rimpattami senza dumandati amore
Hè ch'eo spartu altrimente issu dulore
Pensu chì ogni storia puru s'ella fussi nera
Ùn vale mai nè un fucile nè una guerra
Solu a cuscenza spassiunata d'al di terra
Ripigliu
Tù in qualchi locu o qualchi mondu chè tù sia
Fermi stampatu com'è iss'alte puesie
Com'è isse stelle accese in le notte sumiglie
Eo ti tengu un sguardu francu da li venti scemi
Un batelucciu biancu spechju di ghjastemi
Nantu à un mare d'oliu di sogni è d'impremi
Eo ùn vogliu tene nè amarezza nè rancore
U tengu tale è quale in core u nostru amore
Com'è un sognu ch'ùn si spenghje incù l'albore
Jean-Charles Papi