L'ochji fissi à u cilenti
Sentu batta in u me essa,
U silenziu è i turmenti
Di a to stirpa sottumessa.
Vicu a faccia sanguinosa
Di a to ghjenti chì si taci,
Quandu a putenza ghjilosa
Tumba à nomu di a paci.
E vurria in un surrisu
Invintà ti un lindumani,
Stà à senta u to avisu
Pà fà ch'oghji sia d'umani.
Trà i petri accatastati
Di un inghjusta sipultura,
Vicu i to cari cascati
Pà mantena una cultura.
Sentu a boci chì mughjava
Aldilà di ogni fruntiera,
Pà dì ch'ùn voli essa schjava
Solu parchì hè nata nera.
E vurria in i to sguardi
Sguassà tutti i pienti vani,
Dicendu ch'ùn hè mai tardi
Pà fà ch'oghji sia d'umani.
Vicu in celu quiss'albori
Di un appaciata prumessa,
Duva ùn conta u culori
Chì ogni vita hè listessa .
Vicu u soli di spiranza
Spannà di l'omu a scimità,
Pà fà crescia a tullaranza
In quissu mondu da rispittà.
E vurria senza risparu
Porghja pà sempri una mani,
In un mondu ghjustu è paru
Pà fà ch'oghji sia d'umani.