Nce do cristiani, maritu e muiere
La televisione tutte le sere
La banca ggiustata a mienzu la stanza
Do piatti diversi e la stessa pietanza
Lu pane, lu vinu, la nostalgia
Na vecchia chitarra, la fotografia
Te lu vagnone ca mo stae luntanu, fatica a Milanu.
Partiu allu '90 cu cerca fatica, nu ncera nu sordu mancu se mpica
E ulia cu castima e nu chiaa le palore
Ma mo sa piazzatu e stae de signore
E mo tutti l'anni, pioggia o sereno
Ne schiattarisciamu dieci ore de trenu
Ma tantu de Lecce lu postu lu cchiamu, partimu a Milanu.
Quand'è primavera ggiustamu lu paccu
Cu cose ca nce sulamente allu taccu:
La salsa, lu vinu, l'oiu te ulia, le rape, le frise e ogni fessaria
Taraddri e buccacci e ogni condimentu, ca addunca stai stai poi diventa Salentu
E cu ddri piezzi de panu de granu, spedimu a Milanu.
La vespra, la vecchia rapezza cazzetti
Ci nde soni a casa te face cospetti
Tranne quandu iddru torna de fore, canusce lu rusciu de lu motore
Se azza e nde apre in tutta fretta, lu iuta cu scaraca la cascetta
Ca comu ogni sera, cornetta alla manu, chiamamu a Milanu.
Ci boi cu te dicu cummare Maria, tanimu nu fiju ca stae in Lombardia
In Veneto, Emilia, nel suolo Toscano
Ma quandu unu parte se dice Milanu
Ci boi cu te dicu cumpare Dunatu, tanimu nu fiju ca sae straregnatu
Ca stae all'Alt'Italia, luntanu luntanu
Nu sacciu cu dicu, ma è susu a Milanu.
Quandu rria lu state a casa llattamu,
Le cose scasciate le fiendulisciamu
Cangiamu le tende e lu matarazzu, cacciamu le craste sullu terrazzu
E comu ogni annu, cu li Sammarzanu
Facimu la salsa poi la mbuttijamu
Mintimu de parti lu meju malone, crai rria lu vagnone.
Ddra susu a Milanu le cose su serie
Te tane sicuru nu mese de ferie
E ci se malazza, ci chiede permessu
La ditta lu paca, lu paca lu stessu
Cumpare Dunatu nu è come a quai a nui
Ca ci manchi nu giurnu nu te olene cchiui
E' tuttu diversu, nu nce paragone cu stu Meridione.
Quand'è menzatia iddra stae travajata
"E cala le sagne, sciacqua la nsalata"
E gira lu sugu cu ddra manu lesta
Perché intra sta casa ghe giurnu de festa
Poi dduma lu focu per lu rrustimentu
Le spaddre spazzate e lu core cuntentu
Ca tutti te paru osce an taula mangiamu, fanculu a Milanu.
Iddru rria te la chiazza cu passi veloci
A manu na busta de mendule e noci
Se lleva lu giaccu e vaca lu vinu
Poi te intra la crasta coje lu petrusinu
La tavola è pronta e l'ora è vicina
Nu senti lu rusciu te la vitturina?
Poi le petatozze arretu lu purtone, rriau lu vagnone
Ci boi cu te dicu cummare Maria,
Ca abbia chiu te n'annu ca nu lu vitia
Ma ci ole cu resta poi lu stessu campamu, fanculu a Milanu.
Ci boi cu te dicu cumpare Dunatu,
Nu picca infelice, nu picca praciatu
Lu core e la capu se tane la manu, fanculu a Milanu, o grazie a Milanu.