לַמְנַצֵּחַ מִזְמוֹר לְדָוִד
אַשְׁרֵי מַשְׂכִּיל אֶל דָּל
בְּיוֹם רָעָה יְמַלְּטֵהוּ השם
השם יִשְׁמְרֵהוּ וִיחַיֵּהוּ
וְאֻשַּׁר בָּאָרֶץ
וְאַל תִּתְּנֵהוּ בְּנֶפֶשׁ אֹיְבָיו
השם יִסְעָדֶנּוּ עַל עֶרֶשׂ דְּוָי
כָּל מִשְׁכָּבוֹ הָפַכְתָּ בְחָלְיוֹ
אֲנִי אָמַרְתִּי השם חָנֵּנִי
רְפָאָה נַפְשִׁי כִּי חָטָאתִי לָךְ
אוֹיְבַי יֹאמְרוּ רַע לִי
מָתַי יָמוּת וְאָבַד שְׁמוֹ
וְאִם בָּא לִרְאוֹת שָׁוְא יְדַבֵּר
לִבּוֹ יִקְבָּץ אָוֶן לוֹ
יֵצֵא לַחוּץ יְדַבֵּר
יַחַד עָלַי יִתְלַחֲשׁוּ כָּל שֹׂנְאָי
עָלַי יַחְשְׁבוּ רָעָה לִי
דְּבַר בְּלִיַּעַל יָצוּק בּוֹ
וַאֲשֶׁר שָׁכַב לֹא יוֹסִיף לָקוּם
גַּם אִישׁ שְׁלוֹמִי אֲשֶׁר בָּטַחְתִּי בוֹ
אוֹכֵל לַחְמִי
הִגְדִּיל עָלַי עָקֵב
וְאַתָּה השם חָנֵּנִי וַהֲקִימֵנִי
וַאֲשַׁלְּמָה לָהֶם
בְּזֹאת יָדַעְתִּי
כִּי חָפַצְתָּ בִּי
כִּי לֹא יָרִיעַ אֹיְבִי עָלָי
וַאֲנִי בְּתֻמִּי תָּמַכְתָּ בִּי
וַתַּצִּיבֵנִי לְפָנֶיךָ לְעוֹלָם
בָּרוּךְ השם אֱלֹקי יִשְׂרָאֵל
מֵהָעוֹלָם וְעַד הָעוֹלָם אָמֵן וְאָמֵן