Ayen d-iyi-yuɣen
Mačči d ayen ara awen-ḥkuɣ
Imeṭṭawen
Ur zmireɣ ad awen-nettruɣ
Ifassen ttwarzen
Ifadden kkawen
Fukken yimeslayen
Tagi a medden ad as-cfuɣ
Aql-i gar iberdan yeɛreq webrid i usali(2)
Muqleɣ s igenwan ttraǧuɣ tawwurt ad telli
Muqleɣ s igenwan rǧiɣ tawwurt ad telli
Ttɛeddin wussan
Acemma ur iban
Qqimeɣ ɛeryan
Bɣiɣ aḥbib ur yelli
Ayen d-iyi-yuɣen
Mačči dayen ara ad awen-ḥkuɣ
Imeṭṭawen
Ur zmireɣ ara ad awen-nettruɣ
Ifassen ttwarzen
Ifadden kkawen
Fukken imeslayen
Tagi a medden ad as-cfuɣ
Leḥsab akk rriɣ,akken akk nniḍen i yeffeɣ(2)
Agemmuḍ ufiɣ,teḥselḍ deg-s ay allaɣ(2)
Mačči akka i nwiɣ
Mačči akka ay bɣiɣ
Ulaniɣer i rriɣ ur zmireɣ ara ad as-rewleɣ
Ayen d-iyi-yuɣen
Mačči d ayen ar awen-ḥkuɣ
Ayen akk yelhan yuɣal-iyi d asmekti(2)
Ayen akk iɛeddan ad iḥettec ad yettcetki(2)
Lḥif d iɣeblan
Urfan d ineẓman
Lawan d iwehman
Ad iḥemmeẓ ad yettsifi
Ayen d-iyi-yuɣen
Mačči d ayen ad awen-ḥkuɣ
Wi gren di twaɣit,
Tawaɣit wi as-izemren
Wi gren di twaɣit
Ala netta i as-izemren
Ad thuz tendemmit,ad yekkat gar yifassen(2)
Win teɣḍer ddunit
Teṭṭef-it tmeddit
Win tekbel tallit
Ma d nekk aql-i gar-awen
Ayen d-iyi-yuɣen
Mačči d ayen ara awen-ḥkuɣ
Tuɣal d idrimen,nekkini idrimen ulac (2)
Mi jemɛen medden,nekkini xeddmeɣ tuɣac(2)
Wigad iḥercen
Wigad iṭṭurcen
Tafrara i as-kkren
Tanzayt i bubben tirac
Timetti tbeddel ass-a ur icuba iḍelli
Timetti tbeddel ass-a mačči d iḍelli
Wa yeffeɣ-it leɛqel,wa di lɣerḍ-is ur yelli(2)
Winna akken i nḥemmel
D ccḍeḥ i iḥemmel
Abendayer ṭṭbel
Taqbaylit tegra ur tecqi
Tinna akken i nḥemmel
D ccḍeḥ i tḥemmel
Abendayer ṭṭbel
Taqbaylit tegra ur tt-tecqi
Wigad-nni i nḥemmel
Yal wa anda iḥemmel
Abendayer ṭṭbel
Taqbaylit ur ten-tecqi
Tigad-nni i nḥemmel
Yal yiwet i tḥemmel
Abendayer ṭṭbel
Taqbaylit ur tent-tecqi