Sie isch ales am vergässe
Sogar wär sie isch
Ihri Wonig isch e Aquarium
Und sie isch en chline Fisch
Es wohnt no en grosse Fisch do
Aber dä isch meischtens wäg
Dä cha schnuufe dusse
Mehreri Täg
Und wenn er mengmol hei chunnt
Bringt er ihre öppis z ässe mit
Sie isch immer ganz überrascht
Au dass ihn immer no git
Sie lauft ume i de Wonig
Immer di gliiche Wäg
Vo de Stube i d Chuchi
Bruucht sie drü vier Täg
Und zum en Kafi mache
Hät sie drü vier Stund
Will ihre immer wieder Züüg
Vo früener in Sinn chunnt
Vo denn wo's no guet gsi isch
Wo sie no öppis hett chöne mache
Oder halt ebe nöd oder vielicht doch
Luter eso Sache
Vo hüt chunnt ihre nüt in Sinn
Will jo au nüt meh isch
Nume sie i dem Aquarium
Als chline Fisch
Sie macht Lischte i ihrem Chopf
Vo dene wo tschuld sind
Morn schriibt sie ales uf
Wenn sie en Schriiber findt
Irgendwenn goht sie wieder use
Irgendwenn lernt sie wieder schnuufe
Aber sie chunnt jo nöd emol meh
Bis zu de Türfale ufe
Sie isch en chline Fisch
Chlii und alt
Und irgendwenn verschwindt sie
Im Bode imene Spalt