Walaɣ iɛedda yiwen
La yettru weḥd-s
Nniɣ-as ḥku-d ik-yuɣen
Yesla-yi-d yeḥbes
Aɣbel mi ara t-yeḥku bnadem
Ad yers uqerru-s
Iɣeblan mi ara ferqen
Taɛekkemt ad tifsus
Akka i d lehlak n ddunit
Anwa akka ur nuḍen
Lɛebd ur tezgil twaɣit
D win i yetɣaḍen
Yenna-d ad k-yeṣṣer Rebbi
Aqla-k di leɣlaḍ
Ass-agi ayen yeḍran yid-i
Mačči akken id-twalaḍ
Ṭbib yefka-yi cehrayen
Iwakken ad mmteɣ
Ddreɣ ussan rẓagen
Leɛqel-iw yeffeɣ
Yenna-yi-d ṭbib ass-agi
Ur ttmettateɣ
Lferḥ-iw yuɣal d imeṭṭi
Imi ay idireɣ
Walaɣ iɛedda yiwen
Yettaḍsa weḥd-s
Nniɣ-as Rebbi ad k-iɛiwen
Yesla-yi-d yeḥbes
D acu i la k-yesseḍsayen akka
Mli-yi-d ad ḍseɣ
Ula d nekk ḥwaǧeɣ taḍsa
Γef wul-iw ad kkseɣ
Axir win yettaḍsan win yettrun
Akka id-qqaren
Axir lewrud mi ara fsun
Wala ad qqaren
Yenna-d aḥbuh ay acrik
Lemmer ad ak-id-ḥkuɣ
Uggadeɣ ad yezzi leɛqel-ik
Axiṛ ad ttuɣ
Lhemm d wukud id-ttnaɣeɣ
Yewweḍ ɣer lḥed-is
Yegra-yi-d kan ad ḍseɣ
Ugadeɣ axiṛ-is
Muqel kan amek iyi-tga ddunit
La ttaḍsaɣ fell-i
Qqaren-as taḍsa deg twaɣit
Ad k-yenju Rebbi
Walaɣ iɛedda yiwen
Yesnuzun tirga
La yessawal wa yaɣen
Nniɣ-as aqli da
Zenz-iyi-d tirga n tegmatt
Γur-i dayen ulac
Ad nessefreḥ tayematt
Ad argun warrac
Tekfa ɣur-i targit-agi
Zenz-iyi-d kra
Σyiɣ fell-as d anadi
Ur ttufiɣ ara
Zdat-i iferec-d kra id-yewwi
Ihuz tuyat-is
Yettɛawad-iyi-d tamuɣli
Yekres anyir-is
Yenna-d mazal-ik teṭṭseḍ
Tagmat, targit-is
Ur tettnuz ur tt-tettafeḍ
Iɛedda lweqt-is
Asmi akken itt-id-ttawiɣ
Ugin a tt-aɣen
Tura d ccwal id-wwiɣ
Fell-as ttnaɣen
Walaɣ tɛedda tayri
Tettnadi afennan
Tenna-d wa yessefrun fell-i
Anwa i yestufan
Ata tufiḍ win im-ilaqen
Berka kem anadi
Aqli seg wid i kem yesnen
Ma tesliḍ yis-i
Isem-im d nekk i t-yessawḍen
S itran n yigenni
Yal itri ad as-yeslen
Ar ɣur-m ad d-yeɣli
Tezzi-d ɣur-i texẓr-iyi-d
S yir tamuɣli
Tessusem tuɣal tenna-yi-d
Ad k-yehdu Rebbi
Tenna-d ɣer ccib n leɛmer-ik
Tettnadiḍ fell-i
Ruḥ xir-ak lhu-d d lhemm-ik
Ttuɣ-k ttu-i
Γef yilemẓi ucbiḥ n ṣṣut
Ttnadiɣ fell-as
Win akken ibeɛden ɣef Imut
Γef selbent tullas