'O cardillo dint'â cajola sta chiagnenno ca resta sulo
E Carmela ca resta sola se sta zitta, ma fa pietá
I' nun chiagno, pecché mme pare comme fosse 'nu dissonore
Pecché penzo ca 'o militare cierti ccose nun 'e ppo' fá
Ma a Carmela, mia dorge sposa
Gli ho prommiso 'na bella cosa
Ce appresentamm'a 'o rre pe dicere: "Maistá
Carmela senza 'e me nun vo' campá, nun po' campá
Quann' 'o vvulite vuje, tutto se po' aggiustá
'Na branda a tutt'e dduje, nce 'a pònno dá, nce 'a pònno dá"
♪
E mammélla mme fa 'na pena quanno prega a Giesù Bammino
"Mo ch'è 'o tiempo de la nuvena a 'stu figlio mme ll'hê 'a lassá
È 'nu buonu ciaramellaro ma nun serve comme a guerriero
Tu mme lieve 'n'oggetto caro ca nun tiene che te ne fá"
Ma a mammélla ca nun reposa
Gli ho prommiso 'na bella cosa
Ce appresentamm'a 'o rre pe dicere: "Maistá
Mammella senza 'e me nun vo' campá, nun po' campá
Quann' 'o vvulite vuje, tutto se po' aggiustá
'Na branda a tutt'e dduje, nce 'a pònno dá, nce 'a pònno dá"
♪
Addio pianta 'e carufanielle, addio vòccole e pullicine
Che 'a matina, tutt' 'e mmatine, v' 'a facíveve attuorno a me
Addio poveri ppecurelle ca restate senz' 'o pastore
I' ve lasso 'nu piezz' 'e core, ma nisciuno ll'ha dda sapé
Ma a 'o cardillo ca nun reposa
Gli ho prommiso 'na bella cosa
Ce appresentamm'a 'o rre pe dicere: "Maistá
St'auciello senza 'e me nun vo' campá, nun po' campá
Quann' 'o vvulite vuje, tutto se po' aggiustá
'Na branda a tutt'e dduje, nce 'a pònno dá, nce 'a pònno dá"
'Na branda a tutt'e dduje, nce 'a pònno dá, nce 'a pònno dá"