Ente los nuesos l.lugares
Que dan fruitu más melgueiru,
Unu sei you que s'aniya
En tan guardáu abrigueiru,
Que nu'hai brexel de mazanas
Con más candor de soleiru.
Nin en Valencia tien outru
La güerta entera ya vera.
Que yá verdá bien lo sabe
Quien una vez tan siquiera
Saborióu el bon sabore
De l.laranxas de Balsera.
Un día, siendo you nenu,
Fui andando hasta Treviyas
Pa ver la feria, la ponte,
Ya outras ralas marabiyas,
Ya mercar una navaya
Pa las mías carpinteiriyas.
Al.ló cheguei al.lastadu
Col afán de la carrera
Ya, pa matame la sede,
Una bona l.laranxera
Dioume dadas dúas l.laranxas
Dúas l.laranxas de Balsera.
Cuando por l.longos caminos
L.lonxe m'afayéi d'España,
Recuerdo un día de soleiru
Ya d'estreldu de gadaña
Que foi de los más sequiosos
Qu'afanéi en tierra estraña.
Ya xunta Xénova entoncies,
Na l.laranxosa riviera,
Dixo l'alma señaldosa:
"¡Ai qué sede, ai quién me diera
Unas gotinas de zusmiu
De l.laranxas de Balsera!"
Volvéume Dieus compasible
Pa la mía tierra sidrosa,
Ya na mía bona tierrina,
Tan duz ya tan deliciosa,
Gustéi de nuevo sin priesa
Toda la fruita melosa.
Pero sobre mil sazones
De mazana ya de pera,
Pol sou sabor de recuerdu
La fruita prima primera
Pal cielu de la mía boca
Son l.laranxas de Balsera.
Cumo corra la sonada
D'estas mazaninas d'oiru,
Bien breis que de l.lonxe, l.lonxe,
Con toda clas d'andadoiru,
Ha a venire xente, xente
En busca d'esi tesoiru.
Así pueis, valdesaninos,
Cal.lái, cal.lái de manera
Que naide venga roubanos
La ricura verdadera
D'esi brexelín douradu
De l.laranxas de Balsera