Cna-agi d-amehbul
Agi d-amehbul
Am win yegulen yeḥnet,
Cna iwumi xeṛben lemtul
Mi xeṛben lemtul
A yatmaten ur katet,
Ma ur a wen d-yezgi ɣef wul
Xas ḥsebtett d-aserwet,
Xas ma d-aserwet
Ddem-t aɣeṛbal siffet...
Yenna-as wungif: aka,
Ah wungif: aka
A d-teddu neɣ ad-tefk isem-is,
Tella tecεel, hatt, tensa,
Tecεel, hatt, tensa,
Times deg i nezhent wallen-is,
Yettwali mebεid ur yeẓṛa
Tin yeṭfen deg jufar-is,
Yesbaεdent wallen-ik,
Muqel anda yedda uḍar-ik!
A yaṣegaḍ s-iɣimi,
Aṣegaḍ s-iɣimi
ṣeggem ɣef znad afus-ik,
S tnesla neɣ s tmuɣli
Ah naɣ s tmuɣli,
I tettmeyizeḍ lɣeṛḍ-ik,
ɣas ayen tḥuzaḍṭ, yeɣli,
Mačči d-winna i d-axṣim-ik,
Mačči d-allen kan
Awalli n-wid it yesεan,
Sani tmeyeẓḍ ak-teffeɣ
Ah ar d-ak-teffeɣ
A win yettazun iɣes,
Tasraft n lwiz-ik teffreɣ
N lwiz-ik tefreɣ
Asmi aken i k-yeɣḍeṛ yiḍes,
Aɣilif ifaden-ik yezdeɣ
Rnu ṛṛay-ik d-amwanes,
ǧǧteɣ a nεeddi
Ur mazal yidwen tikli,
A yabeḥri d-yetṣuḍun
Abeḥri d-yetṣuḍun
Sself i yiger, tεediḍ,
Tekiḍ-d ɣef wid i tettun
ɣef wid i tettun
I wakken a ten id-tesmektiḍ,
Anfasen i wid i cefun
Timeqbeṛt tedduri lḥir,
A lmiytin cfut:
Win yettun, yedder yemut,
Tebɣam-tt, ur tt-tebɣim-ara
Neɣ ur tt-tebɣim-ara
Sefrutett-id ad nwalli,
A wid yegunin tara
Yegunin tara
Teswam-tt almi d-teṣenṭi,
Mi iban lḥeb-is yefra,
Leḍyur wwint d-imensi,
Iεeda-ken lḥal
Ur d-yegri yidwen wawal,
Beddeɣ di tiɣilt selleɣ
Di tiɣilt selleɣ
I ubeḥri i d-yewwi ṣṣut,
Sliɣ i waεbeṛ yeffeɣ
I waεbeṛ yeffeɣ
D-tiɣri i tebεen lmut,
Ma tfehmem-tt akken i tt-fehmeɣ
Ad nruḥ ad nεezi tafsut,
Ya ṭṭiṛ iεeddan
Mi tṛewled, tbedelḍ amkan,
A wid ur nzegel lewqat
Ur nzegel lewqat
Dεut ad teḥbes tɣeṛsi,
A wid i zeglen taswaεt
I zeglen taswaεt
Teǧǧam acudu ur yefsi,
Mi twalam alluy yefat
ḥebert a t-ṣeggem trusi,
Lhem i ḥemleɣ
Si dduḥ i yides netnaɣ
Cna yagi d-amehbul
Agi d-amehbul
Am win yegulen yeḥnet,
Cna iwumi xeṛben lemtul
Mi xeṛben lemtul
A yatmaten ur katet,
Ma ur a wen d-yezgi ɣef wul
Xas ḥsebtett d-aserwet,
Xas ma d-aserwet
Ddem-t aɣeṛbal siffet...