Ohèj giovinotti fii ben attenzion
Ve voeuri cantà ona bella canzón
De dúu fradèj prèss a Milan
Vun Battista e l'alter Giovann
L'ha cominciàa el fradèll pirlòtta
Che 'l ghe parlava a ona paisanòtta
De statura puttòst bassa
L'era larga quatter brazza
L'era bella l'era bònna
L'era savia 'sta fiolònna
Del color del latt e vin
L'era el tesòr del Giovannin
Ma 'l sò fradell sto cicolàtt
'L sghignazzava come on matt
A vedè 'l fradell pirlòtta
Che 'l ghe parlava a sta paisanòtta
Te vedarèmm ti ohèj remolàss
Con chi l'è te 'ndarét a sposàss
Te vedarèmm ti ohèj remolàss
Con chi l'è te 'ndarét a sposàss
Allora lú pien de pontili
El butta el capell in del Navili
El cor de sora in del cassetton
El tira foeura i pagn del feston
El ciappa el tram che vègn a Milan
El va a l'albergo di Trii Tulipan
El va in d'on trani a mangià on boccon
El ved ona dònna lì in d'on canton
On poo con furia e on poo con flemma
L'invida a disnà insemma
El gh'è stàa insèmma ona giornada
E poeu a cà se l'è menada
Ohèj fradell a gh'hoo chi 'l tesór
L'è granda e gròssa e la par on tór
Ohèj fradell a gh'hoo chi 'l tesór
L'è granda e gròssa e la par on tór
Hann combináa 'sti dúu tripée
In del stèss dì de toeu miée
E han invidàa precisament
Tutta la porta e tucc i parent
Poeu han mangiàa de la gran famm
Votanta chili de salàmm
Quaranta gaijnn cinquanta capon
Sett porscèj e vòtt monton
Trii padéj de risòtt giald
Quatter mastèj de lasàgn cald
Ses cavagn fra uga e pêr
E quatter navasc de caffè ner
Poeu han bevúu sti dúu meschin
A squarciagola brent de vin
Oh mamma mia sont bon pú de boffà
Spètti l'ora de 'ndà in létt a cobià
Ma anca lú 'n el vedeva l'ora
De 'ndà in lètt con la soa sciora
Ma l'era grassa come on boeu
E de l'uss la passava nò
Fin che rusa e rusa ben
Han riessí a rusàla dent
Fin che rusa e rusa ben
Han riessí a rusàla dent
L'ha cominciàa sto gran donnòn
A trà foeura la scuffia capell e spinón
Tra foeura la scuffia a l'inviada
Ohéj la gh'aveva la crapa pelada
L'ha cominciàa quiét quièt
A tiràgh foeura tutt i fassètt
E lú 'l vosava Vègn chí o fradèll
Vedèlla in camisa la par on cammèll
La gh'ha i oeucc fosch fosch
La gh'ha 'l nas che tira i mosch
Poeu la gh'ha 'l stòmegh che 'l par on teccètt
Che per impienill ghe voeur el boffètt
La gh'ha i gamb ch'inn dúu giambon
Sui dit ghe cress i erbion
Per de pù la gh'ha i pee piatt
La gh'ha la pell come quella d'on sciàtt
Ohèj mi credevi menà a cà on barcon
Vedèla in camisa l'è nanca 'l timon
Oh giovinòtti tornèe indrée
Se gh'ii voeuja de toeu mièe
Poeu damm a trà a mi fii 'na ròba precisa
Vardégh ben quand l'è in camisa
Poeu damm a tra a mi fii 'na ròba precisa
Vardégh ben quand l'è in camisa
Pan pòss pan fresch
Indovina che l'è quest
Pan pòss pan fresch
Indovina che l'è quest