Am Dorfplatz im Rank links bim Brunne
Isch's Lädeli vom Fräulein Graf
S'Schaufänschter hätt nur Morgesunne
Bis fascht am Eis sind d Store dunne
Und d'Uuslag macht de Mittagschlaf
S'isch's einzig Gschäft vo alls chasch chaufe
Än Supermarkt in Disneyland
Öb Kaffigschirr, öb Hänkelschlaufe
Öb Camembert vo scho cha laufe
Häsch alls und jedes bii dr Hand
Mer dänkt, mer würd nie öppis finde
Im Gnuusch vo Gschtell und Regal
S gseht uus wie uff dr eigene Winde
Wie s Baschtelszimmer vo Chinde
Und zmidst drinn staht no s Personal
De Iigang gaht nid automatisch
Bim Uuftue schlaat e Glogge n aa
Au wänn e Chund ehnder chli spaat isch
Und s Znacht überobe parat isch
Me git äre no was sie mues haa
Mer isch immer fründli au wenn's wenig choscht
Wer bstellt, dä bstellt mündli vom Hämd bis zum Moscht
Chasch s Chind no allei here schicke
Mit Gält abzählt im Portemonee
S git mängisch sogar öppis z picke
Und s Suppe-Gschtell sötti mer flicke
Sit Jahre scho hetts Ruggeweh
S chlii Lädeli, s weiss ja no nüüt
Vo Shopping und städtischem Flair
Nur s ghört halt zum Dorf, zu de Lüüt
Wie de Brunne und s Chile-Glüüt
Und keine wett dass s grösser wär
Und keine wett dass s grösser wär...