النجم الازهر في النجوم البعيده
أبعد من الابعد ولو كان ينشاف
نجمٍ مداراته سديدة وبعيدة
لكن له وقفه على كل معطاف
مثل الهدو قبل الرياح الشديدة
وان هبت الهوجا فلا شك تنخاف
أربع مواسم في عباره مفيده
ندرك مقادمها على كل من طاف
به جاد ربي وكل علمٍ يجيده
والله عطاه الحكمه اضعافٍ اضعاف
في قمة العليا مكانه ورصيده
الشامخ اللي يطلع بكل مشراف
وسط المحافل له علومٍ مجيدة
كالبارق اللي في سما المجد رفاف
محظوظ من فالوقت يصبح عضيده
يامن ولا يخشى الليالي ولصداف
ماتت به الكلمه العذوبه شهيده
واستنطق الحب بغلاته ولاخاف
يسعد بنا وهوَ الحياه السعيده
متقاسمين الحب وياه بأنصاف
شخصٍ جعل كل الشوارد وحيده
من قبل ما يطلق معايير لهداف
ليثٍ يكيد الكايده ما تكيده
وكل الحمول المثقله عنده اخفاف
غنت له اللي في حسنها فريده
هيفاء غيداءٍ تفرد بالاوصاف
في نحرها كن الجواهر وقيده
متبلورات وبينهن برق خطاف
من دونها تِكْسَر طيورٍ امعيده
وهيبةْ أهلها دونها ستر ولحاف
بنت الفخر عاشت حياةٍ رغيدة
ترفل بثوب المجد وتزّين القاف