Mi sezzo in su giannile, ite friscura
Poi de una die tottu gherra
E de insupportabile calura
Est de iscuru ammantada sa terra
Solu su chelu s'idet isteddadu
E-i s'upa potente de s'alta serra
Su minoreddu ch'apo est ischidadu
Si nd'essit e in coa si m'imbarat
Che anzone chi cheret lusingadu
Si sezzit, mi carignat, si riparat
In brazzos mios e a modu sou
Chentu cosas domandat e mi narat
Babbu, nara, cal'est s'isteddu tou
Eo mi leo cuddu attesu, attesu
Chi lughet meda e devet esser nou
Babbu, narami, babbu l'as intesu
Ch'in s'America como nachi est die
Invece inoghe sa lughe an azzesu
Babbu, in su monte, como, it'at inie
Gioghende b'at crabolos o mazzones
Cand'a los bider che giughes a mie
Est beru chi bandidos e ladrones
Da-e montes nach'essin a furare
Sos boes, sas arveghes, sos anzones
Est beru ch'essin como a passizare
Ma no sighit su narrer: hat serradu
Sos ojos in su menzus preguntare
Dormidi, dormi, fizu tantu amadu
Lughe ti 'ettet fin'a sos chent'annos
S'isteddu bellu chi t'as seberadu
E apas de s'America sos mannos
Tesoros, ma los dias tottu a chie
Famine suffrit, males e affannos
E da-e s'altu monte 'enzan a tie
Si non feras gioghende, sas bellesas
Tottu s'incantu sou d'ogni die
Pro bandidos e ladros, sempre azzesas
Apas pregadorias, ch'in in amore
Giamben su malu fagher, sas offesas
Dormi, ch'a passizare a su lugore
De sos astros sas fadas den bessire
In caminos de prata e de lentore
Dormidi, fizu, dormi! An'a battire
A tie milli sonnos de incantu
E de illusione unu 'estire
Dormi, coro 'e babbu, amadu tantu