Bon'annu a tottu, a minores e mannos
A sos malos comente a sos bonos
Deus perdonet tottu, e diat donos
A chie pius suffrit in sa terra
Tottu sos istrumentos de sa gherra
Diventene rosarios de paghe
Si sicchet de su male su tenaghe
Siat sa fine 'e tottu sos affannos
Falen da-e su chelu, cun sa trumba
Intren in ogni coro, in ogni janna
Sos anghelos cantende a boghe manna
E sonet pro allegria ogni campana
Falet a saccu prenu sa befana
S'aperzana sas jannas de presone
Tzesset de isparare ogni cannone
E torret cun s'olia sa culumba
Ue sa libertade est in cadenas
E persighida sa zente est fuinde
E dogni die a fasches est morinde
De famen e de ballas in tottue
Annu nou pro tottu sias tue
Su sole de su cras in chelu nettu
No passen pius oras de apprettu
In sas barraccas sos terremotados
Bon'annu a tottu sos malefadados
A chie est isfrattadu e no at domo
A sos disoccupados chi sun como
Isettende chi como, a sa befana
Aperzan de traballu una ventana