Procurade 'e moderare
Barones, sa tirannia
Chi si no, pro vida mia
Torrades a pe' in terra
Declarada est già sa gherra
Contra de sa prepotentzia
E comintzat sa passientzia
In su pobulu a mancare
Mirade ch'est atzendende
Contra de 'ois su fogu
Mirade chi non est giogu
Chi sa cosa andat a veras
Mirade chi sas aeras
Minettana temporale
Zente cunsizada male
Iscultade sa 'oghe mia
Su pobulu chi in profundu
Letargu fit sepultadu
Finalmente despertadu
S'abbizat ch'est in cadena
Ch'istat suffrende sa pena
De s'indolentzia antiga
Feudu, legge inimiga
A bona filosofia
O poveros de sas biddas
Trabagliade trabagliade
Pro mantenner in tzittade
Tantos caddos de istalla
A bois lassant sa palla
Issos regoglin su ranu
E pensant sero e manzanu
Solamente a ingrassare
Custa, pobulos, est s'ora
D'estirpare sos abusos
A terra sos malos usos
A terra su dispotismu
Gherra, gherra a s'egoismu
E gherra a sos oppressores
Custos tirannos minores
Est pretzisu umiliare
Si no, calchi die a mossu
Bos nde segades su didu
Como ch'est su filu ordidu
A bois toccat a tèssere
Mizi chi poi det essere
Tardu s 'arrepentimentu
Cando si tenet su bentu
Est pretzisu bentulare