حظك كده
مكتوب عليكي تحبي واحد قلبه صدا
لا الفرحة تقدر تنعشه ولا حزن يقدر يرعشه
ولا نكتة حتى تفرفشه ولا حتى خضة
مع إن قلبك من دهب
مكتوب عليكي تحبي واحد قلبه فضة
♪
حظك كده
كل البنات اللي فحياتي قبلك
إستنوني نمت وغدروا بيا
عدي جوابات الغرام اللي فدولابي
شوفي كام مرة أتغابيت وفتحت بابي
مرة بيضا ومرة سمرا، ودي الطويلة ودي التخينة
وفيه العجوزة، وفيه الصبية
وفي النهاية الكل برضك غدروا بيا
إحتمال العجز فيهم، وإحتمال العجز فيا
المهم إني خلاص ما بقيتش قادر أحب تاني
جسمي نحّس من الحريم
ومن السهر والإنتظار ومن الأغاني
إنتي أجمل واحدة حبتني في حياتي
رقة الكلمة في شفايفك
الخيال اللي محاوطني ومحاصرني وإنتي غايبة
كأني شايفك
العيون المعجزات، اللي بخاف أرفع عينيا
يغضب المولى عليا
والله ما أنا عارف لي خوف
أنا ببقى خايف ربي ولا ببقى خايفك؟
إنتى بكر، كل حاجة فيكي بكر
الشوارع والمدرج والأغاني جوه منك، لسه بكر
أما أنا جيش من الحريم إستهلكوني
ياما رقدوا وياما سكنوا وياما لعبوا
فيه إيجار وفيه اللي ملك
وفيه خدتني وضع يد، صبحت حِكر
وإنتي بكر
طب هننفع؟
عارف إنها مش خطيئتك
إني عيشتي معربدة
بس أعمل إيه؟
حظك كده!