The provost's ae dochter wis walkin her lane,
O bit her luve it wis easy won,
Whan she heard a Scots prisoner a makin his mane
Aye, an she wis the flouer of Northumberlan
He said, "If I had a lassie to set me free?
O bit her luve it be easy won,
A wad mak her a ladie o heich degree
That she'd lowse me oot fae my prison sae strang."
An she's gone her ben tae her faither's bed stock,
O bit her luve it wis easy won,
An she's stolen the keys oot o mony stout locks,
For tae lowse him oot frae his prison sae strang.
An she's gone her ben tae her faither's stable,
An it's, o bit her luve it wis easy won,
An she's stolen the steed that wis baith fleet an able
For tae hurl thaim o'er tae bonnie Scotlan.
Bit as thae were a ridin oot o'er yon Scots muir
He cried, "O bit yer luve it wis easy won.
Get doun frae my horse, ye're a brazen-faced hour,
Altho ye're the flouer o Northumberlan."
She said, "Cook in yer kitchen I shairly will be,
O bit my luve it wis easy won,
For A cannae gae back tae my ain countrie,
Altho A'm the flouer o Northumberlan."
He said, "Cook in my kitchen ye cannae weill be,
O bit yer luve it wis easy won,
For my ladie she wadnae hae sairvants like thee
An ye'll need tae gae hame tae Northumberlan."
Bit laithe wis he thon lassie tae tine,
An said, "O bit her luve it wis easy won"
So he's hiret an auld horse an he's hiret an auld man
For tae carrie her back tae Northumberlan.
Now whan she gaed in her faither did fraun
An said, "O bit yer luve it was easy won,
Tae gang wi a Scotsman whan ye're barely saxteen,
Aye, an ye were the flouer o Northumberlan."
Bit whan she gaed in her mither did smile
An said "O bit yer luve it was easy won
But ye're nae the first that yon Scots hae beguilet
An ye're walcome back hame tae Northumberlan."
"O, ye winnae want breid an ye winnae want wine,
O bit yer luve it was easy won,
An ye winnae want siller tae buy a man wi
An ye're, aye, the fair flouer o Northumberlan."