Bakit ba maraming nagsasabi na
Ang katapusan ng planeta na to'y malapit na
Kung isa ka sa kanila, pare yari ka
Pagkat ito nama'y kasalukyang nangyayari na
Putangina nagsisiputukang mga bulkan
Budburan ng apoy at abo ang kamunduhan
Nakatutustang haring araw, La Nina'ng walang humpay
Mala-asidong sinag, piniprito ka ng buhay
Walang kristo kristo pag ang ipo-ipo
Nagsimula mag-sirko dito, wasak kung sino-sino
Handa ang milyong nitso kapag lumindol dito,
Libo-libo tinupi o dinurog nang pinungpino
Mga bagyo: alam na malagim ito
Lagpas gusali na baha ang mismong sasapitin mo
Daan-daang siyudad, nakalubog sa likido
Mistulang sementeryong nag-anyong dagat pasipiko
Ngayon aminin mo, di ba nangyayari to?
Halik ni kamatayan ay dumapi na sa labi mo
Agaw-buhay ang mundo at kung aaralin mo
Nasa gitna na tayo ng huling paghinga nito kasi
Populasyon dagsaan ngayon
At bagong nakakamatay na sakit kada-taon
Wala pang rasyon ng lunas para sa mga 'yon
Kaya resulta ay mga pamilyang naka-kahon
At bawat nasyon, simot kuryente sa planta
Kapos sa tubig at pagkain ng mga masa
Malawakang pagkagutom ay laganap sa mapa
Matanda at mga bata bulagta sa kalsada
Kaya puro lang gulangan
Dugasan, para lang sa buhay ay lumamang
Sugal lang, sa butas ng karayom pa dumaan
Kaya para lang sa tinapay, may handang pumaslang
Luhaan... nang dahil sa gera
Sa langis at politikal na karera
Teritoryo, prinsipyo, rehiliyon, at sa pera
Gera para sa lahat ng klase na tema
Ang planeta nangangamoy bangkay
Kumalas na ang huling tuyong dahon sa tangkay
Kung tumitibok ang puso mo, wala na 'yang saysay
Kasi kung iisipin, matagal ka nang patay
Bakit ka pa nagaabang ng kamatayan ng mundo
Kung sa lapida'y nakaukit na ang pangalan mo
Katotohanang tumatagos hanggang buto
Dumungaw ka kaya sa bintana ng kabaong mo
Ba't ka pa nagaabang ng kamatayan ng mundo
Kung sa lapida'y nakaukit na ang pangalan mo
Katotohanang tumatagos hanggang buto
Dumungaw ka kaya sa bintana ng kabaong mo