A schwarze Katz faucht mi grummbugglad o
Beidld se kuaz und laffd schnuaschdrax davo
Da Wind wahd greislig, peitscht Reng gega's Gwand
D'Baam danzn dazua und schlong Schatten an'd Wand
As Mondliacht reißt weiß koide Fetzn an Himme
I rach no mei Pfeiff zamm, bas auf und na kimm i!
D'Uhr bleibt schdeh, de Glockn heast singa
Koa Bladl riad se und i schdäh im Zimma
Do häift da koa Keaschgeist und koane Kardn
Es gibt no an Haufa de heid auf mi wardn!
Gwies is' koa Zuafoi dass i heid zu dia kimm
Iaz weast ganz kase, wei'st woast wer i bin
Da Boandlgrama, persönlich, vaschdähd se
Kumm, gäh her do, fia di is' iaz äde!
Nix ko ma doa
Am Schluss schdähd a Schdoa
Eadan fangd's o und head's auf
Schwarz oda weiß
Drahd si zamm zu am Kreis
Und ewig hoid' si do koana drauf
Broad und fest schdähd da Schdamm, pfeilgrod zoagd'a nauf
Und so leicht wia ma moand kimmd koana do nauf!
Gscheid houch sand de Ast und recht glatt is de Rindn
Rauf kemma wennst mägst deafst di scho gscheid schindn
Siaß is da Saft den de Epfe vaschbrechan
Doch gracha dean d'Boandl wenn's beim ro foin brechan!
Mid Graft wadschn di d'Asdln und haun di an Bohn hi
De Wuazln schlong aus, baggan und vagrom di
Sie ziang di noch untn, diaf diaf in de Eadn
Und nean si vo dia, de Wuazln, de gscheadn
De Fasan vom Hoiz wean schdeaka duach di
Ois bliad und waxd weida, bloß du bist dahi
Und jäds moi wennd Zweigal vom Wind oghaucht wean
Head ma d'Bladln laud lacha und leise dei blean
Nix ko ma doa
Am Schluss schdähd a Schdoa
Eadan fangd's o und head's auf
Schwarz oda weiß
Drahd si zamm zu am Kreis
Und ewig hoid' si do koana drauf
Wer'dn macht brauchtn ned
Wer'dn drogd mächtn ned
Wer'dn hod dem kummd's nimma in' Sinn
Wer'dn kaffd griagtn ned
Wer'dn braucht find'n bläd
Aba iagndwann liegd jäda drin
Wer davoa schdähd muas rean
Und du kosdn ned eam
Wennst'n griagst is a gwies noglnei
Wer'dn homm mächt muas schdeam
Du kosd no so blean
An Lewendign dean's do ned nei