Тийм ээ чи нэгэн зууны суутан бишээ
Тэр тусмаа нэгэн зуны настай эрвээхэй биш
Уулсын оргил өртөөлсөн алс нислэгийн бүргэд билээ
Умрын салхи залгилсан гүйдэл холын чоно билээ
Тийм ээ чи гэрийн таримал цэцэг бишээ
Тэр тусмаа нэгэн хаврын настай яргуй бишээ
Хүний гар хүрээгүй хөлгүй далайн чулуун цэцэг билээ
Хүйтэн зулайт уулсын их мөсөн оргил билээ
Тийм ээ чи энхийн цагаан тагтаа бишээ
Тэр тусмаа бүхнийг тэтгэгч бурхан ч бишээ
Ганц олдох амьдралынхаа гарцаагүй жинхэнэ эзэн нь билээ
Галзуу салхит сансарын нэргүй зэрлэг гариг билээ
Тийм ээ чи хоосон мөрөөдөгч ердөө ч бишээ
Тэр тусмаа бусдыг даган баясагч бишээ
Азаа үзэх дуртай чанга харчуудын нэг нь билээ
Алгаа тосох дургүй бардам эрсийн нэг нь билээ
Тийм ээ чи босоо цагаан хийморь билээ
Тэр тусмаа андын сайхан сэтгэл билээ
Үнэн худал магтаалд үхтэлээ дургүйг чинь мэддэг хэрнээ
Үүнээс өөрөөр би дуулж даанч чадсангүй
Тиймээ чи түмэн олны нэг нь билээ
Тэр тусмаа тэнгэр шүтээнд эр хүн билээ
Чам шиг хүмүүсийн нуруун дээр Монгол
Монголоороо бидэнд ирсэн
Чам шиг эрчүүдийн нуруун дээр
Монгол Монголоороо бас үлдэнээ
Тиймээ