ܥܰܠ ܥܶܛܪܳܐ ܕܒܶܣ̈ܡܶܐ ܛܳܒ̈ܶܐ
ܘܪܺܝܚܶܗ ܕܡܽܘܪܽܘܢ ܒܰܣܺܝܡܳܐ
ܢܶܗ̣ܘܶܐ ܡܳܪܰܢ ܕܽܘܟܪܳܢܳܐ
ܠܥܰܢܺܝ̈ܕܶܐ ܡܗܰܝ̈ܡܢܶܐ
ܐܰܝܠܶܝܢ ܕܰܒܗܰܝܡܳܢܽܘܬܳܐ
ܐܶܟ̣ܰܠܘ ܦܰܓܪܳܟ ܩܰܕܺܝܫܳܐ
ܘܶܐܫ̣ܬܺܝܘ ܠܰܕܡܳܟ ܙܰܟܳܝܳܐ
ܘܰܫܟ̣ܶܒܘ ܥܰܠ ܣܰܒܪܳܟ
ܫܟ̣ܶܒܘ ܟܺܐܢ̈ܶܐ ܒܗܰܝܡܳܢܽܘܬܳܐ
ܥܰܠ ܣܰܒܪܳܐ ܗُܝ ܕܰܩܝܳܡܬܳܐ
ܘܚܳܝ̇ܪܺܝܢ ܠܰܡܫܺܝܚܳܐ ܕܢܺܐܬ̣ܶܐ
ܘܢܶܬ̣ܶܠ ܠܗܽܘܢ ܐܰܓܪܳܐ
ܡܶܕܶܡ ܕܥܰܝܢܳܐ ܠܳܐ ܚ̣ܙܳܬܶܗ
ܘܶܐܕܢܳܐ ܕܒܶܣܪܳܐ ܠܳܐ ܫܡܰܥ̣ܬܶܗ
ܘܥܰܠ ܠܶܒܳܐ ܕܐ̱ܢܳܫܳܐ ܠܳܐ ܣܠ̣ܶܩ
ܛܳܘܒܳܐ ܕܫܳܘܶܝ̇ܢ ܠܶܗ
ܫܡܰܥ̣ܢܳܝܗ̱ܝ ܠܰܒܪܳܐ ܟܰܕ ܐ݀ܳܡܰܪ
ܕܰܒܫܳܥܬܳܐ ܕܫܳܡ̇ܥܺܝܢ ܡܺܝ̈ܬܶܐ
ܩܳܠܶܗ ܚܰܝܳܐ ܕܰܐܠܳܗܳܐ
ܩܳܝ̇ܡܺܝܢ ܕܠܳܐ ܚܒܳܠܳܐ
ܐܰܝܠܶܝܢ ܕܰܥܒ̣ܰܕܘ ܛܳܒ̈ܳܬܳܐ
ܠܰܩܝܳܡܬܳܐ ܕܚܰܝ̈ܶܐ ܚܰܕ̈ܬܶܐ
ܘܰܐܝܠܶܝܢ ܕܰܥܒ̣ܰܕܘ ܒܺܝ̈ܫܳܬܳܐ
ܠܰܩܝܳܡܬܳܐ ܕܕܺܝܢܳܐ
ܥܰܦ̣ܺܝ ܐܺܝܣܚܳܩ ܠܰܐܒܪܳܗܳܡ
ܟܰܕ ܒܳ݀ܟܶܐ ܘܥܰܝܺܝܩܳܐ ܠܶܗ
ܒܗܳܝ̇ ܕܰܟܣܶܐ ܗ̱ܘ̣ܳܐ ܢܽܘܚܳܡܳܐ
ܘܠܳܐ ܐ̱ܢܳܫ ܝܳ݀ܕܰܥ ܠܶܗ
ܐܰܠܳܗܳܐ ܓܠ̣ܳܐ ܠܶܗ ܠܡܽܘܫܶܐ
ܘܡܰܠ̣ܶܠ ܥܰܡܶܗ ܘܶܐܡ̣ܰܪ ܠܶܗ
ܕܚ̈ܰܐܝܺܝܢ ܐܶܢܽܘܢ ܠܰܐܠܳܗܳܐ
ܟܺܐܢ̈ܶܐ ܘܙܰܕܺܝ̈ܩܶܐ
ܡܰܢܽܘ ܚ̣ܙܳܐ ܐܶܠܦܳܐ ܚܕܰܬܳܐ
ܕܰܛܥܺܝܢܳܐ ܥܽܘܬܪܳܐ ܪܰܒܳܐ
ܘܗܰܠܟܰܬ̣݀ ܒܝܰܡܳܐ ܕܡܰܚܫܽܘ̈ܠܶܐ
ܘܥܽܘܬܪܳܗ̇ ܐܶܬܝ̣ܰܬܰܪ
ܡܰܪܝܰܡ ܗ̣ܺܝ ܐܺܝܬܶܝܗ̇ ܐܶܠܦܳܐ
ܘܰܡܫܺܝܚܳܐ ܥܽܘܬܪܳܐ ܒܓܰܘܳܗ̇
ܘܗܰܠܟܰܬ̣݀ ܒܥܳܠܡܳܐ ܘܝܶܗܒܰܬ̣݀ ܗ̱ܘܳܬ̣݀
ܚܰܝ̈ܶܐ ܠܡܳܝ̈ܽܘܬܶܐ
ܠܕܺܝܢܳܐ ܥܰܠ̣ܬܽܘܢ ܛܽܘܒܳܢ̈ܶܐ
ܘܰܠܕܰܝ̈ܳܢܶܐ ܐܰܒܗ̣ܶܬܬܳܘܢ
ܘܰܠܣܳܛܳܢܳܐ ܫܰܦ̣ܶܠܬܽܘܢ
ܘܰܠܒܺܝܫܳܐ ܙܟܰܝ̣ܬܽܘܢ
ܘܰܐܝܟ ܕܰܗܒܳܐ ܡܶܢ ܓܰܘ ܟܽܘܪܳܐ
ܢܦ̣ܰܩܬܽܘܢ ܡܶܢ ܐܽܘܠܨ̈ܳܢܰܝܟܽܘܢ
ܘܗܳܐ ܢܳܨ̇ܚܺܝܢ ܕܽܘܟܪ̈ܳܢܰܝܟܽܘܢ
ܒܰܫܡܰܝ̈ܳܐ ܘܒܰܐܪܥܳܐ
ܕܟܺܝܪܺܝܢ ܢܒܺܝ̈ܶܐ ܘܰܫܠܺܝ̈ܚܶܐ
ܕܰܐܟ̣ܪܶܙܘ ܩܽܘܫܬܳܐ ܒܰܒܪܺܝܬܳܐ
ܕܟܺܝܪܺܝܢ ܣܳܗ̈ܕܶܐ ܩܰܕܺܝ̈ܫܶܐ
ܕܰܢܨܰܚ̣ܘ ܘܶܐܬܟ̣ܰܠܰܠܘ
ܕܟܺܝܪܳܐ ܥܺܕ̄ܬܳܐ ܥܰܡ ܝܰܠܕܶܝ̈ܗ̇
ܘܡܰܪܝܰܡ ܝܳܠܕܰܬ ܐܰܠܳܗܳܐ
ܕܟܺܝܪܺܝܢ ܟܽܠܗܽܘܢ ܥܰܢܺܝ̈ܕܶܐ
ܕܰܫܟ̣ܶܒܘ ܥܰܠ ܣܰܒܪܳܟ