بعدني جاهز راكض وشفت الحاجز
في هاجس وصلت وقعدت كأني حاجز
مكاني ثابت كأني في الأقصى مرابط
في عزلة بس مع الفكرة إنعديت كأني مخالط
بالخط في تماس كأنني بغالط بس لسه شادد
بحط ألوان عالعنوان بالأسود كأني حادد
ليش حاقد الحكي جديد زي كأنه بدل فاقد
الهوية من حديد حتى لو في جدار وسلك شائك
بارضي ماكن من كل الأماكن بضلني هاجم
مش ضحية بعرف إني مظلوم في ظالم
من لما رسموا الحدود والاستقلال عائم
كل الخطوط بارود وريحة الدم شامم
في تطبيع وفوق فلسطين الاعلام غائم
والاسلام غاشم بسمعش بس بشوف كثير حالم
الساكتين كثار بين العمرين مين اختار
في كثير أخطار فا فعلا رح أروح على المختار
لأني بدي أقاوم بديش أقارن كلنا في إلنا أقارب
أو ناس راحت عقارب قالت لا بديش أحارب
الفكر بالسالب بس لسه بجاوب وأنا متثاوب
مش قادر أتنفس تحت الأنقاض مناوب
مش بحرية بتحرير بطالب حتشوف مين الغالب
بكفي تبرير وحكي زايد لكل أسير في مية قالب
يعني شعب كامل - بخليك تآمن - تكون الآمر
اوعك تساوم -
معلش رجعني على الأندلس بورفاڤو
خليلهم الثور وأعطي جيرانهم وعد بفلور
هيني بستنى من ال٦٧ وأنا نازل عالغور
معاي كرت المؤن و مفتاح وكفن وبستنى بالدور
وماسك حجر وسكين آخذ بثار الو سنين
أكثر من أربعين وثمنية انت عارف البدوي مين
بحكي معاك أخوك الفلاح بدعوك للكفاح
حتى لو مش مسلح بتقدر بأصابعك تكون سفاح
هم الاستعمار لازم ينزاح بلكي بهالمكان بنرتاح
هيك بزبط الانفتاح لما السجن والسجان يكون راح
شو ما كان مفهوم وطنك بعمر
كيف ما كان أجلك بضل أطهر
فيهوش خذلان وخيانة
حتى لو الدرب كان التبانة
حتى لو كل البلاد كانت خربانة
اذا بنسقيها بأيدينا ما بتضل ذبلانة
اذا مش عارف القرار لسه قرارك
حتى لو محكوم من أصدقاء أعدائك
اليوم نفذت بكرا ممكن تكون اشلائك
اذا اليوم سكتت بكرا ممكن يكون اخلائك
اصحى وقاوم اصحى وداوم
اصحى وحارب اصحى وحاول
المجد للشهداء المجد لصحاب الأرض
المجد للشعوب سكوتك خيانة وانك تحكي فرض
ما تفكر وجودك بفلسطين بس بعني إنك عايش تحت رحمة محتل
الاحتلال موجود بكل شكل وبكل مكان وبكل زمان
اصحى